D Jugendabteilig vom Dameturnverein bietet für die Chline wie au die Grössere Turnstunde ah. Für die Chlinste gits zämme mit de em Papi oder em Mami (Gotti, Götti, Nochberin, Opi, ....) s MUKI (MUtter und KInd-Turnen). D Kindergartechinder könne im KITU (KInderTUrnen) ihres turnerische Könne zeige. Ab em Schuelalter biete mir d Meitlirigi ah (Mädchenriege Thürnen).
MUKI (2-4 Jährigi)
Vielsitig und erlebnisrichi Turnstunde werde ahbotte, damit die Chlinste d Freud an dr Bewegig chöi entdecke und nebebi werde d Mamis ins Schwitze brocht. Während de MUKI Turnstunde wird au viel gsunge und drzue bewegt.
MUKI: Dienstag 09.30 – 10.30 Uhr
Leitung: Martina Buser, Kontakt: 078 801 45 30
KITU (5-6 Jährigi)
Im Kitu wird nach em Motto: „Lernen - Lachen – Leisten“ turnt. Ziel isch es, d Freud an dr Bewegig z fördere und d Turnhalle mit all ihrne Grät z entdecke. S KITU wird ahbote für alli Kindergartenkinder.
KITU: Freitag 15.45 – 17.00 Uhr
Zuedem biete mr z Diepflinge für d Kindergartenkinder es KITU ah: Donnerstag 15.45 – 17.00 Uhr
Leitung: Luana Sama, Nelly Weber, Regula Morf, Sandra Weber
Kontakt: 061 971 52 63
Mädchenriege (7-16 Jährigi)
Schülerinne vo dr 1.-9. Klass turne im Moment gemeinsam jeweils am Mittwuch in der Mehrzweckhalle z Thürne.
Es wird turnt und verschiedensti Sportarte betribe:
Leichtathletik: Sprint, Weitsprung, Ballweitwurf, Medizinballstossen, Laufen,…
Spielsportarten: Unihockey, Basketball, Indiaca, Volleyball, usw.
Geräteturnen: Bodenturnen, Reck, Barren, Ring,….
Natürlich darf dr Spass im Turne nie z churz cho. Dorum mache mr auch vieli chlini Spieli und thematischi Turnstunde zu Ostern, Halloween, Weihnachten und so witer.
Nebst de Turnstunde möche mir au an diverse Wettkämpfe wie em Hallenmehrkampf, an Waldläufe sowie Jugendturnfeste und den UBS Kids Cup mit.
Sid em August 2019 gits us Mangel an freiwillige LeiterInnen und interessierte Schülerinne us dr Oberstufe (5.-9. Klasse) nur no ei Meitliriigi:
Turnstunde: Mittwoch 18.30 – 19.45 Uhr